每逢大家要執衫，最煩惱係要處埋一啲過咗季嘅衣物。例如而家大熱天時，點樣處理一啲呢排唔會著嘅冷衫、厚褸等 換季衣物 呢？其實只要你掌握3個步驟，就可以好快手處理完成！即睇！
步驟1：分類
第一件事要提醒大家，衣物收納最重要係「分類」！分類做得好，收納冇煩惱！
以冬天衣物為例，大家好容易可以咁分類：
1）過咗冬天就一定唔會著嘅厚褸：大褸、冷衫、羽絨褸
2）氣溫25度或以上都唔會著嘅衣物：棉質長袖衫、有裡長褲、長裙、有帽Tee
3）間中變冷會著一著嘅衫：棉質外套、長袖Tee
4）春寒晚上會著下嘅衫：薄外套、長袖恤衫
以上呢個分類方法係以漸漸炎熱嘅5月後「可能使用頻率」來分類，愈厚重嘅衣物可以愈早進入以下嘅步驟2。其實，換季收納往往係要分批做，一次過多數做唔晒！
步驟2：清洗
分類之後，千祈唔好就咁將啲衫入箱！一定要先經過「清洗」嘅步驟，將啲衫清洗乾淨先可以降低滋生塵蟎、發霉嘅機會。建議你，清洗順序按照以上步驟嘅分類1至4分批清洗。
強調一下，分批清洗係指「不同時間清洗不同類嘅衣物」。尤其係上班一族，返工已經夠攰，去到周末要洗平日嘅衫都好辛苦，仲要再洗呢啲換季衫，相當頭痛；所以分批分類咁洗好重要，應該分開幾個星期做，洗完一批就可以直接做步驟3，到下周再洗下一批。
步驟3：儲存
最後一步，就係儲存衣物。建議你可以使用斜蓋式嘅收納箱，因為就算箱疊箱，你都可以在斜蓋口存取衣物，唔使逐一移開上面嘅箱。如果驚衣物受潮發霉，可以先用真空收納袋包裝好衣物，再放入箱。其實你都可以用尺寸較大嘅一般密實袋代替真空袋，比較平之餘，亦好適合收納Tee恤或冷衫呢類唔易有摺痕嘅衣物。
資料來源：香港經濟日報
HOUSE101.com.hk
▲ HOUSE101 香港網上搵樓放盤平台
▲ APS101 全新地產代理工作系統
今時今日身處香港這個活力之都，實在讓人忙得透不過氣… 與你談討居家生活、提供置業貼士、講盡全城熱話。尋覓置愛？由這裡開始！